日成控股 (3708) IPO

日成控股 (3708) IPO令我注目的是其保薦人「天財資本」(真是個好名)(利申:我落咗飛抽日成)

因為天財的保薦人往績超級厲害

TC Capital_IPO-past record

這三隻股票都是異常地數以倍計地升,共通點是3隻都是創業板+全配售。簡單來說就是「圍晒飛」自己人玩晒,任佢開。

而其中冠輝保安 (8315) 及 JC GROUP (8326) 都是阿仕特朗和東方滙財有份包銷,樂亞 (8195) 則由富泰中順包銷,睇嚟阿仕特朗和東方滙財有呢2間參與嘅都要望一望。

side track咗,入返正題。

係天財資本嘅異常強勁嘅往績下,吸引到我留意日成控股,而再發掘落去,越覺得有「景轟」,

(再題外話,好煩,我知:而呢篇嘢我是要畀返個credit RF嘅fishlove兄(雪球上佢叫michael tsang),我是從佢寫新利控股 (1240) 篇文啟發到我發現3708有尐異樣,如果畀心機在RF打滾都可以吸收到相關經驗練成睇到佢嘅異常之處,但有fishlove 1240嘅文,就簡單易明得多。

先旨聲明,我呢個credit是畀在啟發到我去睇佢點解異常,而不是因為(覺得)隻股會升,佢上市/之後表現如何唔關事,想講清楚尐。3708是賭大細,爆上同爆落都唔出奇。差尐漏咗,有好多啟發都是來自湯兄在RF的3708討論串得到,基本上呢篇所謂分析,湯兄已經講咗好多,我只係再用自己嘅文字整理下)

3708 日成控股IPO 有乜咁異常?

1. 保薦人/包銷商
天財資本上面都提過佢往績根本是不正常地強,用佢做保薦人去上,好難唔相信會有怪事發生。而今次包銷是金利豐「金仔」,有金仔唔代表一定有嘢,但是好多大茶飯都是有金仔份。

2. 集資時間
好正路咁諗,集資梗係越多人抽越好,目的是確保足額順利抽水,日成就相反,臨近年尾例牌淡季上(加上細股呢期堅弱,尐人去晒炒大股),招股期仲要撞到1月1日新年,再少多一日,懷疑是刻意「低調」,唔想人玩

3. 集資額
集資淨額只有51.4百萬,而更重要嘅係,RF入面都有提到,上市前勁派息:「於二零一四年十二月一日,本 公司向其唯一股東宣派股息約 87 百萬港元,將以本集團內部資源支付,其中約 80 百 萬港元於二零一四年十二月支付及餘額約 7 百萬港元將在上市前支付。」(招股書第14頁)

集5千萬之前派8千幾萬走,顯然唔係等錢使。

4. 貨源分配
今次IPO至少有一半是配售(順帶一提,配售當中有一半是舊股,估計是想套下現),而「配售股份將有選擇地配售予若干專業及機構投資者以及其他投資者」(招股書第306頁),即係可以揀配畀邊個,OK,配畀「人頭」會是合理懷疑吧?

仲有,上市後大股東是渣盡75%股權(這是上限了),25%公開發售「至少」有一半是可以配畀指定嘅人,即是呢度加埋是至少82.5%。

再者,今次公開發售是玩甲、乙組,甲組即是我呢尐老散抽嘅,乙組即是頂頭鎚落夠半數公開發售股數(即2797萬除二,約1400萬股)嗰班大戶,重點是,「為進行分配,根據公開發售可供認購的公開發售股份總數將初步平均分為以下兩組:」(招股書第305頁)睇到嗎?是平均。呢尐奇怪嘅股票,都落咁大注上乙組,會係普通人?即是普通街外人抽得嘅,好可能只係當中嘅一半,如果唔計超額回撥,公開發售只佔2.5%,一半,即是1.25%。

提到超額回撥,呢一點其實好重要,如果超額到某個程度,公開發售就會撥多尐,第一個threashold就是15至少於50倍,由2797萬股增至8391萬股,即是說,如果唔超額15倍,就只會得2797萬股,即是2.5%畀你班老散認購,不過就算去到接近50倍,都只會有7.5%派街。呢隻咁淡唔會有50倍的

睇返之前第2點,呢個IPO估計是刻意「低調」,即是超額數估計是刻意壓低,意味䧏低派貨到街外嘅數目。

所以,呢隻股是好乾,82.5%股權未有招股結果前已數得到,最乾嘅情況下,是除了嗰2.5%之外,其餘97.5%是有機會盡在所謂人頭同大股東手上,仲有,嗰2.5%是有一半是分給乙組,而乙組又安排了人頭的話,OK,最極端情況下是98.75%盡歸人頭+大股東手上,如果之後SFC出權股高度集中,都有可能的。

5. 老闆有炒股經驗
呢嗰又是RF度睇返嚟,老闆曾經炒607,當時仍叫匯多利,炒到畀人告,相信老闆都是炒股人,一個炒股人,自己有隻間上市公司話事,佢有尐「ambition」去搵尐搞作,會否搞大茶飯?

6. 賣殻
有人估賣殻,應該是合理懷疑,不過我唔識賣殻嘅嘢,我都想有人分享一下,不過,講到賣殻,今次唔用返阿仕特朗和東方滙財而用金仔,我相信金仔的人脈是比前兩者更強,能夠REACH到更多殻買家。

7. 總結
從刻意低調,唔想人抽,加上運用機制如配售條款等,令貨源有咁乾得咁乾,「圍飛」是合理推算,咁既然係咁,有機會是有人要「圍飛作歹」吧⋯⋯

老實講,我落飛抽,都是賭一鋪,極乾嘅股票是乜都有可能發生,爆上爆落都得,同埋呢隻不是在創板+全配售上,往績未必有太大可比性,我都唔知賭得啱唔啱,希望首日升返尐畀我賺下。

同日成IPO完全無關嘅吹水部份:
好耐唔打文,一打就打呢尐,轉晒風格。

咁就超過一年無係度吹過水,唔知舊網友仲記唔記得呢度?

2015新一年,要爭氣

廣告
本篇發表於 fatlone's view, 個股研究 並標籤為 。將永久鏈結加入書籤。

7 Responses to 日成控股 (3708) IPO

  1. fatlone 說道:

    人頭?

    http://www.etnet.com.hk/www/tc/news/commentary_expert_detail.php?category=stocks&expert=simon&newsid=ETN250107805

    *日成控股有炒味*

      昨天已經截止認購的新股日成控股(03708),由於之前沒有公關公司作宣傳,亦沒有
    邀請分析員作飯局,市場曾傳出可能不足額認購。怎知在截飛前聽聞有數十張大飛入市,公開認
    購部分超額20多倍,需要在國際配售中回撥。日成業務是維修及翻新各類私人及公共樓宇,業
    務穩定。今次上市集資額約是1﹒4億元(若以中間價0﹒5元計算)。由於是主板,殼價本身
    已值4億元,但即使是以最高位定價,市值也僅是6﹒7億元,故炒味甚濃,筆者估計下周三(
    14日)上市之日應有不錯的升幅。《恆豐證券研究部董事 林家亨》

  2. paul chan 說道:

    真係學到好多嘢睇你post 你會否出對新龍移動ipo1362睇法 post

  3. fatlone 說道:

    更正:乙組應是認購額超過500萬港元,而不是頂頭鎚先至入乙組

  4. Fung 說道:

    多謝分享FATLONE ! 我今日都留意緊呢隻股, 見到你呢個POST, 今日升到1蚊左右, 你認為佢有POTENTIAL再上嗎? thanks !

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s