個股研究: 北控水務(371.hk)

呢一篇唔會好似卡姆丹克咁會有少少數可以計下, 因為呢間公司既價值係唔可以從數字去推算出黎, 而且, 如果單睇數字, 呢間公司係完全無投資價值, 但係觀乎我買既股票全部都幾十倍P/E, 咁又點? 咪又係會升, 硬係要揀低P/E既話九倉(004.hk)可能係一個好選擇

北控水務有兩大概念: 1)注資; 2)水利

水利概念既話可以睇返我之前打既文章(水利股 – 2011年開局重點出擊板塊)

注資概念方面, 其實近日北控水務股價咁強勢就係反映緊注資概念, 而且依照供股規模去睇注入既資產都應該非常大件, 斷估都唔會十億八億了事, 供股集資淨額都成33億啦, 呢個數目其實同好多IPO集資額差唔多, 甚至有過之而無不及, 而且係公佈供股既同時, 向母公司北京控股(392.hk)收購資產唔係用供股所得既資金, 而係另外向北控配發新股, 發行價以除權價再折讓15%做基準, 除權價應該係2.555, 即係發行價係2.17左右, 大額供股後再配發新股, 睇得出北控水務係十分激進

而供完股都唔夠仲要配番股畀自己, 我估計母公司係收緊貨, rather than要套現, 我就係捉住呢一點所以買入, 我相信大股東係收緊貨, 所以我要同大股東同一陣線! 係股海中, 要贏就要理解大股東做緊乜, 短線黎講, 大股東散水可能仲有得升, 不過我未見過長遠計大股東會做錯, 有邊個會比大股東自己更清楚自己盤生意?

大股東只係渣住4成幾貨, 我估呢個就係佢唔配股而選擇供股既原因, 再配就會進一步撻薄自己既股權. 近日已經公佈左2個大型集資行動, 我相信配股唔會係短期內發生, 所以短期內應該唔會抽高配股

再深入研究落去, 發現371要大額供股係因為佢係2010年開展左好多項目, 大家可以去佢個官網度睇下(http://www.bewg.com.hk/big5/business/project.htm) , 因為太長, 所以我唔post上黎, 我建議大家去上述網址之後copy&paste落word度, 之後再ctrl+F(搜尋)"2010″, 咁應該會highlight晒2010年開展或完成既項目, 我做過呢個步驟之後發現2010年北控水務既動作真係好多, 可見資金需求係十分之大, 要抽水33億係唔出奇, 奇怪既係點解係一般財經資訊網站公佈既新聞當中係唔見有咁多項目上馬, 係咪因為2010年通水既工程係2010年之前就已經埋單計數, 定話真係有好多項目仲未入賬? 可能係我自己研究未夠深入, 2010年半年業績已經講左我未知掛…

其實北控水務既成長力度唔可以用佢自身既體積去做推斷, 呢間公司係由北京控股撐腰, 北控已經講到明未來既重點會係水務(《國企紅籌》北控:下半年資本開支不逾50億,主要投資水務項目), 北控水務今年預料會有爆發式增長, 我睇至少都有一個開, 而唔會7,80%就算數, 呢尐全部都唔會係financial figures入面睇到, 所以好鍾意計數計一大餐, 之後就覺得咁先叫分析一間公司既話, 對不起, 371絕對唔會係呢類人杯茶, 但係, 我呢尐「唔識計數、只識去賭」既小朋友, 就係鍾意呢尐數字上咁唔合理但又係咁會爆上去既股票, 我唔知出完呢篇文之後會唔會跌返落黎, 但至少佢真係爆過, 而且我覺得大股東仲有貨在手可以注入371, 仲有成長空間

我估計, 今次可能係最後一次直接由母公司注資入北控水務, 之後有關水務既投資會交由371自己搞, 371自己個體積都有返咁上下, 應該有能力用自己既名義去做融資, 唔使下下都經呀媽手

至於北控會注入乜野資產落北控水務? 打下打下篇文, 我又查到去392個網頁, 發現佢旗下除左已經上市既北控水務之外, 仲有2間屬於水務業既公司分別係北控制水有限公司以及北京北控環保工程技術有限公司, 係股權架構表入面係睇唔到後者, 而根據392既2010年半年業績, 扣除371帶來既盈利, 其他水務業所佔盈利有7250萬港元, 不過唔知包唔包括北控環保工程帶來既盈利, 暫時當佢無包括, 即係好簡單咁將7250萬乘二, 估計全年純利有1.4億, 我地暫且以呢個數目作為將來注資帶來既額外利潤, 以我過往觀察中航科工既經驗(我知係唔同行業, 係咁求奇架咋我:P), 注入既資產都係以10倍P/E咁上下黎做計價, 所以我估今次注資規模會在14,5億左右, 又或者係唔會低過呢個數

其實係中國水務市場北控水務應該係其中一間最進取, 從以下既網站進行既統計可以睇得到, 在回眸2010:哪些水业市场事件最给力?入面, 該網站選出49個最具影響力既中國水業市場事件中, 北控水務佔左9個, 其中有2個係佔據前十名; 而在回眸2010:主要水务企业新增业绩排名入面, 北控水務名列第一位, 新增業績比第二名多出一倍以上; 根據回眸2010:水务企业实力排名, 北控水務係排名第三, 頭兩名係香港都無上市, 所以北控水務係在港上市既水務股之中最具規模, 而且規模遠勝其他在港上市對手. 我睇過入面既網友留言, 有人話入面既數據唔準, 又話排名係花錢買返黎, 我認為就算做假, 都應該可以信七分, 同埋入面D網友無話北控既數據做假:P 順帶一提, 股評人黃敏碩先生係"水務股前景有保證“一文中提到中國水務(855.hk)係行業龍頭, 我唔知係佢睇尐數據太舊, 定話以為個名係中字頭就一定係龍頭大佬, 查實照返上面既數據黎睇, 就算打個七折, 中國水務同北控水務差幾個層次, 仲要話佢歷史P/E得13倍估值低, 其實水務股已經受到市場關注, 如果真係咁勁, 點解佢仲未爆? 可能其他人之後會講"追落後", 所以要買入855, 又或者會話371都值五十幾倍P/E, 855簡直係大落後超值搏, 就算係升一倍都只係371既P/E既一半etc… 再長氣地講多次, 歷史P/E係死既, 如果市場仲係給予咁低估值855, 即係間公司本身營運唔夠人地好, 依家371以雷霆之勢狂搶市場, 2011年既步伐唔會慢落黎, 分分鐘仲會加快

今年北控水務應該係挑戰第二位既首創股份, 大家都係來自北京, 大家都係國企, 係2010年北控既增長力度遠遠拋離首創, 如果今年情況持續, 第二名既寶座可能會被北控水務取代

我查下查下, 我搵到呢個網站(北控水务整合起步 剥离非主业), 發現佢大股東最初成本價只不過係0.4… 依家用2蚊以上做基準, 對於大股東黎講已經係十分慷慨…

有關371有乜潛力同消息, 我地可以參考下(第一上海:北控水務繼續向外擴張 評級買入)同埋湯財既北控系相關消息區

展望今年, 激進既發展策略將會持續, 而隨之而來既多數都係大規模既抽水行動, 所以371呢個平台會好好咁被母公司利用, 因為咁, 呢隻股一日未利用完, 個故事都唔會完, 尤其係依家我自己覺得大股東仲係收緊貨, 佢都未派貨出街, 又點會畀隻股散? 依家暫時未見有基金身影, 不過遲下就可能會有, 有基金進場先係爆得最轟烈之時, 以現在撰文之時北控水務約200億既市值, 應該吸引到大戶進場

總之我就嘗試代入大股東既角度去分析, 大股東自己都配咁多股畀自己, 先唔好理大股東以咁大折讓收貨係好著數, 要知道如果收左咁多貨出街, 將來要沽返相同金額既貨(記住係相同金額, 唔係相同股數, 相同股數既話仲得掂?), 係十分之困難既事, 依家講緊係呢一輪供股行動大股東已經至少會增持左接近10億股, 仲未計將來印公仔紙去搞收購又唔知會印幾多畀自己, 總之現階段我確信大股東係收貨, 佢一日收貨個故事就未完, 我相信佢要炒高到一個地步, 盡量將出貨既影響減到最低, 股價越高, 要賣返同自己投資既資金對等既股數越少, 股市唔係善堂, 大股東上得市就係要抽水, 一定係賺錢, 無端端收購一大堆資產再隊落個殼度畀你班人賺咁傻仔? 天下間是沒有免費午餐! 但係只要我地同大股東同一陣線就會搵到餐食~

而當時2008年, 371前身上華控股重組成今日既北控水務, 曾經炒過上3.9(以供股後除權價計算係3.2左右, 呢個係etnet睇返黎, 不過唔知經過中間咁多動作佢會唔會調整呢? 我就唔肯定了), 好明顯之前係炒到過晒龍, 不過今時唔同往日, 2010年北控確實進行過大量既收購, 不可同日而語, 所以中短期升浪睇下可唔可以挑戰3.2呢個歷史高位, 突破之後就真係乜頂都破晒

落車位我會睇下大市市況同埋佢本身既走勢, 見弱既就減持, 暫時都未有定案, 但一定要留意大股東動向, 如果見到大股東都想散貨, 我會即刻減持, 甚至清倉, 既然我買入既理據主要係嘗試觸模大股東既心理, 咁我覺得大股東想抽水唔玩, 我當然要跟住走人啦

都打左好多野, 係咁多先, 都算對得住「個股研究」呢四隻字… 我唔係亂畀架:P 唔吹返咁上下我都唔會畀呢個標題(強調, 係「吹」架咋…:P), 可見我真係重注買入371, 希望佢會繼續升啦!

廣告
本篇發表於 個股研究, 水利股 並標籤為 , , 。將永久鏈結加入書籤。

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s