2011 potential turnaround股: 金風科技

我先前寫過篇「17蚊既金風科技值搏」, 自己亦真金白銀有買過落去, 注碼都唔細, 不過已經止蝕離場, 呢次止蝕係我近幾個月其中一個成功既操作, 我分開幾注買, 平均成本應在17.5以上, 之後我見佢反彈乏力, 果斷地在16.7左右一炮過沽清

首先申明, 現階段金風科技(2208.hk)的確不宜進場, 因為個勢真係「熊」到不得了, 一浪低於一浪, 多多錢都唔夠溝. 走勢差既主因係風電行業競爭激烈, 爆發價格戰, 兼且美國要求世貿調整中國補貼風電業者有無遺反規則, 而市場增長預期會開始轉慢, 或者仲有其他因素我唔清楚

雖然金風科技走勢好差, 但我依然堅信佢係風電最強, 簡單黎講, 呢一刻佢係隻廢股, 但係佢從來都係一間好公司

金風科技行既係直驅永磁技術, 好處係結構簡單, 唔需要齒輪箱, 所以維護成本可以降低, 我係看好呢個技術, 維護成本佔整個風機壽命成本既一個重要部份, 長遠計可以體現呢種技術既優勢

而且, 金風「走出去」既步伐係中國同業最快, 最重要既一步係收購左德國Vensys, 而近來最大既動作係於美國設立分公司, 仲有同其他外國公司搞技術合作, 海外市場既佈局進展迅速, 若管理層有實力可以打入國際市場, 新增長點指日可待, 依家仲係燒緊錢, 唔知幾耐先開始有收成, 就睇下幾時會有尐新海外訂單陸續出現, 金風畀人感覺到係真係做緊野, 其他中國公司真係唔夠佢黎

而市場擔心中國風機新裝配速度會減慢, 係風電股被降低估值既原因之一, 對此我有另一個睇法.

我覺得市場擔心既野係無錯, 因為中國風機市場已經持續高速增長一段唔算短既時間, 慢落黎唔出奇, 不過所謂既慢落黎應該都有20%增長; 而成個餅增大速度細左, 不過寡頭壟斷趨勢越見明顯, 開始有跡象顯示, 由之前既三大巨頭(金風、華銳及東方電氣)變成金風華銳之爭, 我最後見既報道話華銳同金風既市佔率分別係27%同21%, 而東方電氣主流仲係1.5MW風機, 但係金風華銳已經開始唔玩1.5MW, 升級去2.5MW, 如果跟唔到呢個步伐好難同佢地兩個鬥, 最大型既公司成本一定最低, 依家正值價格戰既時候, 龍頭一定會係呢個時候趁勢搶佔市場更多份額, 個餅可能無變大到不過龍頭企業食大份左, 依家只係睇下食多左既份額可唔可以抵消到價格急降既負面影響, 我諗未來金風同華銳可以食到中國60-70%既風機市場, 我睇金風可以佔到30%甚至更高

除左海外市場, 海上風機係下一個增長點, 金風科技作為兩大巨頭之一, 一定可以食到呢塊餅, 華銳係海上風機既龍頭, 不過中國海上風機市場只不過剛剛起步, 金風實力雄厚, 我唔認為佢會輸畀華銳呢個靠強大後台而急速帶大既「龍頭」

照我平日睇開既報導睇, 金風對自身產品既技術掌握程度十分之高, 甚至乎所有關鍵部件都已經摸透, 我認為呢方面華銳不及深耕風電產業多年既金風, 而金風係產業鏈整合下過苦功, 成本有優勢, 價格戰下金風能立於不敢之地, 除非有人不惜血本都要打倒金風呢個風電巨頭, 但機會好低

從多方面睇到金風科技真係一間好公司, 係非常有實力, 依家佢股價跌唔係因為間公司有問題, 係行業估值被調低, 所以金風作為其主要參與者一定會被人係咁洗, 風電市場既估值無可能無限期被降低, 至少係呢一個時候我相信風電仲有得玩, 而且係仲有一段唔短既時間可以玩落去, 增長係2011年就此打住我覺得可能性係好低, 除非出現另一次如08年既金融危機等等既黑天鵝事件

依家金風H股大約trade緊20倍P/E, 招股預測2010年盈利22.35億RMB(大約25.3億港元), 我假設呢個數係可信, 我諗調低估值到2010年既15倍P/E就會有較大支持, 即係大約14蚊左右, 如果穿左14蚊, 我覺得呢個位係有支持, 而直覺認為好似誓要洗到落15倍P/E都唔罷休咁, 我覺得15倍已經反映到金風既負面消息, 而我認為再望落去係12倍P/E, 即大約12蚊, 10倍P/E既金風我諗個市本身都有問題…

依家就等下金風2010全年業績, 睇下會唔會令市場大跌眼鏡, 會派一份有驚喜既業績. 我個人睇主要要睇下第四季既表現, 因為價格戰係果陣已經開始, 睇下金風會受到幾大影響

我作為有睇開風電股既老散, 我要買風電股既話, 呢一刻只會一注獨贏金風科技, 而做齒輪箱相關部件既中國高速傳動我當然係看淡, 雖然兩者未必唔可以並存, 不過如果直驅風機將來證明係好過要用齒輪箱既雙饋風機, 咁中傳動前景不被看好

中長線我睇好金風科技, 但係呢一刻市場共識係調低估值, 我地唔好同市場作對, 越跌越買, 我既策略係要等到跌勢回穩, 甚至開始出現上升趨勢先好買入, 暫時我會以連續4個星期都收於10週線之上(或連續有4支陽觸就更好)做初步確認, 4個星期既走勢應該有一定可信性, 轉勢既訊號可能係一支大陽觸, 而大升既原因可能係重大國策支持, 或者盈喜等等會畀市場相信會轉向; 又或者可以係慢慢建立起單邊升勢, 以金風科技既體積基金可能要收貨收一段時間, 升勢可能持續得耐少少, 一切都係我估估下

將來睇返我呢篇野應該會好有趣 🙂

廣告
本篇發表於 風能, 新能源 並標籤為 , 。將永久鏈結加入書籤。

4 Responses to 2011 potential turnaround股: 金風科技

  1. 為李 說道:

    本人認為金風要比人洗到去$7.5呢個低位

    • fatlone 說道:

      你好, 新朋友為李兄, 你係基於咩假設? 金風科技我有信心會再次騰飛, 不過依家唔係時候, 我可以做既係"唔買"

  2. Adrian 說道:

    很有趣的文章,本人最近也有留意風電行業的動向新聞,係尼度或者都可以分享下我既睇法,對於風電設備行業的分析,我會去觀察以下三點:
    1. 利好消息
    相信有留意新聞都知道,我國十二五規劃裡面其中一樣是推動清潔能源的高效利用,風力發電是其中一項重點的開發方向,所以風電行業將來定必會受到很多國策的支持。

    2. 行業技術優勢分析
    風電技術現時主要有兩種,直驅風機同埋齒輪箱雙饋風機,下面的連結是關於兩種技術的比較的文章:
    http://www.fenglifadian.com/fengdianzhishi/3128A5DBH_2.html
    雖然本人覺得尼篇文章有點主觀,有少少偏幫齒輪箱風機,但都值得參考。本人睇完尼篇文章後,有以下結論:
    1. 兩種技術不論在成本、維護和穩定性都各有優勢和劣勢。在成本方面,本人覺得直驅永磁唔係嬴晒齒輪風機的,維護方面,亦唔見得直驅比齒輪較易維護,穩定性方面,齒輪風機比直驅更穩定是無庸置疑的,詳細可以看看以下文章:
    http://big5.china.com.cn/gate/big5/invest.china.cn/wwwroot/c_000000030001/d_26461.html

    但有一點,我亦都好同意你既觀點,就係齒輪損耗問題,如果長遠黎計,直驅的確係會比齒輪優勝,但這個所謂既長遠,會係幾耐呢?十年?二十年?定係更長?齒輪驅動風電機組而家係佔據全球85%以上市場份額。係尼度可以想像一下,如果尼85%的齒輪風電機組轉晒做直驅風機時間需要幾耐,就算直驅技術已經成熟到可以替代齒輪,相信都會有一段時間係直驅和齒輪並用(只係想像,技術上唔知可唔可行?),更可況直驅技術本身也有穩定性既問題,尼d技術問題需要幾多時間解決?我相信當直驅風機既市場份額開始接近齒輪風機的時候,直驅皇朝才真正開始。

    3. 行業發展分析
    由於國策支持關係,而且相關行業已經高速增長一段唔算短既時間,行內競爭越來越劇烈,行業由高速增長轉化成汰弱留強,所以留下來的只會係龍頭。金風科技同埋中國高速傳動係行業既龍頭,我相信無人懷疑的,分別係採用既技術唔同。

    由你尼一個post開始直至而家都差唔多成年了,相關既股份已經跌到非常之唔合理,中傳動P/E只係得2.7倍,而金風P/E係3.7倍,睇黎中傳動比金風更抵,學你話齋,D股跌到咁,已經唔係企業本身既問題,而係個市問題。相信市況好番D之後,尼兩隻會帶來巨大回報。

    • fatlone 說道:

      多謝adrian兄既回覆, 可以同你交流我好榮幸

      唔睇真係唔知直驅有咁多地方係輸畀雙饋, 睇到呢度, 我真係覺得金風真係好夠膽

      我覺得, 金風賣到咁多GW既直驅風機, 係同功率既風機黎講, 應該係同雙饋有得鬥, 不過adrian兄你講得岩, 市場份額證明一切, 呢一刻, 直驅都係小數, 如果真係取代到, 一兩年就見到逆轉

      唔講技術, 講公司, 中國風機市場兩大龍頭, 華銳vs金風, 我係對金風係偏心, 對華銳既感覺甚至係有尐睇唔起, 如果一間公司長久以來都專注經營佢自己既事業, 重視自己既技術, 所得既下場竟然差過一間只靠買生產證快速佔領市場既公司, 我會替金風不值, 當然, 可能有人會覺得金風咪又係大陸公司, 都係靠德國人(收購vensys), 但我覺得金風行緊既路線(永磁直驅)係未有人試過all-in落去, 抄極都有個譜, 都無人帶頭做, 就只得靠自己研發

      經營公司同做人一樣, 一步一腳印, 靠自己雙手得來既成果, 唔會咁輕易畀人帶走, 根基打得穩, 長遠而言, 一定係贏家

      如果想投資中國風電業, long 金風, short 華銳應該係幾好既策略

      再次感謝adrian兄既分享, 讓我重新認識風電技術同市場

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s