2011太陽能行業簡單分析與展望

可能打從一開始要玩太陽能股就係個愚蠢既決定, 不過既然投入咁多心機落去, 而自己都開始對呢個行業有一定認知, 做生不如做熟, 我決定繼續跟落去

我之所以話係愚蠢, 係因為呢個行業實在太多不確定性, 如果缺乏明確既趨勢, 市場只會給予一個較低既估值, 加上行業競爭十分激烈, 稍為跟唔上步伐就差唔多可以收檔

太陽能股近日繼續其波動既特性, 一個星期內, 可以由大升變到打回原形, 先幾日仲講緊Q4業績比預期好, 幾日後就因為德國削減補助而又隊返落去, 減補貼一早就預左, 呢次補貼仲要比行業既預期降得少, 但市場就係咁無情, 削補貼就係會令前景變差, 調低評級係好自然既事

最大隱憂係歐洲經濟本身都不被看好, 歐債危機影響下新能源補貼都只會向下降, 而歐洲作為太陽能業最大買主, 真係唔太看好, 加上1Q仲係冬季, 生意可能會再差尐

除左隱憂, 依家太陽能行業真係一個迷局, 仲未有分析或者報導可以講得出依家既情況, 現況係不斷有人話減補貼, 增長不如去年, 甚至唔會增長, 前景看淡下但擴產計劃不斷傳出, 唔少廠商既產能已經被訂滿, 從比較可信既模組價格黎睇, 降幅唔算好大, 唔似外間既人看得咁淡, 產能增幅遠高於售價跌幅, 真係唔知實情係點, 我地又睇唔到實質安裝量有幾高, 可能其中一個解釋係下游廠庫存水平提高, 未賣出產品但照落訂單, 究竟業內人士盤算緊尐乜? 難道佢地覺得今年同上年一樣, 會有好多人趕係削補貼期限到之前落大量訂單? 真係睇唔清…

睇長遠少少, 市場看好意大利, 美國同埋日本(可能加埋中國)會接力, 我自己就唔會咁睇好, 意大利都係歐洲國家, 財政實力存疑; 美國就一向都係咁仆街, 得個講字, 美國咁多廢地用黎放panel就最岩, 偏偏佢個市場都只係得果1GW左右, 依家仲要拎中國廠商開刀, 得個1GW就咪鬼嘈啦, 中國起碼有7成產品係銷往歐洲, 美國市場暫時未成氣候; 日本市場就應該用返國產野, 中國野應該唔使點指望打入去, 日本人先唔想用中國野

太陽能市場仲未有明確既趨勢, 但降價既趨勢就十分明確, 仍然係不斷跌, 市場共識係溫和咁跌, 我一路打呢個entry一路去睇太陽能既新聞, 發現cell price per watt由去年9月既1.43美元跌到依家大約1.2美元, 應該好快跌到落1.1美元, 2011年目標應該係穿埋1美元里程碑

個個分析員都係覺得降價就係毛利率下跌, 盈利下跌, 總之就係負面, 但我抱住「當全世界都抱住果個看法往往都係睇錯」既心態, 停一停, 諗一諗, 再分析落去, 發現我係可以搵到原因支持我抱住呢個心態

長久以來, 太陽能業係不斷降價, 但係具競爭力既廠商係越做越大, 有實力既參與者早已適應, 真正令全行業都受到考驗既係金融海嘯, 因為經濟突然轉壞, 搞到大部份項目都停工, 係訂單大跌先至令佢地蝕錢既主因, 減補貼都唔係主因, 補貼講明會年年減, 只要減幅唔好太過勁, 廠商都可以適應, 對行業黎講, 最致命既打擊係無生意可以做, 而唔係要佢地減價, 我擔心係有國家叫停部份或所有太陽能項目(如法國已經暫停所有太陽能項目), 又或者大幅降低部貼(如西班牙大降45%), 一年十幾%既削幅係可以被不斷下跌既售價所抵消

我認為不斷減價係一個好事, 減價會令全行業提升競爭力, 依家根本係挑戰緊每間廠既極限, 究竟可以減得幾快, 當大陸強勢進入呢個行業, 降價既速度一定唔會慢得去邊, 依家個個都等緊太陽能做到grid parity, 即係市電同價, 當太陽能成本同普通火電一樣會錢就會有好多國家會推動太陽能, 到時我相信太陽能業會變成一個毛利率唔高, 位處比較好既產業鏈位置既可能有20%左右, 但市場會變大好多所以銷量會以高速上升, 完全可以offset到毛利率下跌既影響, 其實大家都唔係期待緊grid parity出現? 降價咪就係加速實現既方法

而且, 售價下降, 唔代表成本唔可以下降, 硅價依家同時不斷下降, 上網睇返尐太陽能報價網, 硅價都有跌, 依家都仲賣緊60美元/kg, 我印象中保利協鑫講過佢地既成本係30美元左右, 未來仲有下降既空間, 我相信硅價仲有得跌, 因為廠商跌得起, 原材料價格下跌可以帶動全行(單指硅基太陽能)成本下跌, 我相信新電廠項目回報率因此可以保持係補貼削減前既水平, 加上全球經濟都應在復甦, 太陽能項目唔會再好似08, 09年咁慘淡

我諗各國政府都係等緊太陽能成本不斷下跌, 跌到咁上下就開始出手, 最具潛力係中國, 因為可以好似德國政府咁以GW計咁起廠既, 除左美國, 日本, 就只有中國可以,不過前兩者都視中國為競爭對手, 點會開放市場畀你, 咁唯有靠中國自己

中國政府一旦為項目上馬, 好多時都引發爆發式增長, 風電係一個例子, 依家香港既太陽能股最大既推動力都係國策, 不過講黎講去都係「十二五規劃」同埋「金太陽工程」. 前者太空泛, 只能給予投資者一個概念, 後者就只係一個實質效用好低既補貼政策, 聽講好多人係起尐低質量工程呃補貼, 所以金太陽無乜用

最有力既國策激勵, 之前已經有傳過, 就係確立資源差別光伏標杆電價, 消息傳出當日卡姆丹克爆上過7%, 傳下都咁勁, 如果真係落實, 我諗太陽能股有呢個實質強力支持應該會引起價值重估, 咁其實資源差別光伏標杆電價係乜? 以我理解係給予由太陽能所發出既電一個標準訂價, 中國仲未大規模推行太陽能係因為無一個標準電價, 我搞個太陽能發電廠不過計唔到回報率咁即係唔會有人去搞架嚕… 呢個電價係包含左補貼, 好似德國行緊果套政策咁, 如果好似德國咁太陽能所發出既電要全部接收, 咁我諗中國一定會大規模上馬, 因為有補貼打底, 確認有利可圖之後, 一定會有人去做, 我估頭一年都已經可以有幾GW既新增項目

如果仲未介入太陽能既朋友, 我認為最好既時機應該係等呢個標桿電價出台後, 太陽能股獲得重估先進場, 我假設太陽能股會大升, 呢一段升浪應該係十分和味, 現階段我唔會建議無睇開太陽能既人貿然進場

先前寫好既拙作個股研究: 卡姆丹克太陽能 2011版本, 我加埋呢一篇作為補完, 配合行業分析會更加全面

廣告
本篇發表於 個股研究, 卡姆丹克, 太陽能 並標籤為 , 。將永久鏈結加入書籤。

2 Responses to 2011太陽能行業簡單分析與展望

  1. WR 說道:

    Very good article, or study…learn from this

    since the first month of 712 list in market, i started buy-in, still now, i still continuous buy-in. i believed to choose a right CEO is first step to be success. Mr. Zhang Qian is a visionary guy

    • desmondctt 說道:

      Hi WR, i think this is the first time u leave ur comment here, welcome to share ur thoughts and views here!

      Happy year of rabbit!

      May be i must re-consider to do blogging in written chinese/english, because i assume the visitors should be mainly from local and now i realised that quite some of them are outside of hong kong

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s