個股研究: 卡姆丹克太陽能

卡姆丹克太陽能(712)於2009年10月30日掛牌, 招股價$2.10 (IPO詳情首日破發跌9.17%

以下係712呢6個月既日線圖, 非常之小學雞地用小畫家加左幾條線同幾隻字, 懶係有技術分析

(真係好小學雞, 但呢個係我初次嘗試, 用極有限既知識去睇圖表, 我一本技術分析既書都未睇過, 技巧係稚嫩尐架喇, 希望日後慢慢會越畫越好)

從圖中睇到近呢個幾月712係整體向上, 升勢唔算急, 不過由於基數低, 最低位股價只有$1.2x, 升到依家$1.6x即係已經升左3成有多

因為懶, 我無貼埋其他太陽能股既表現上黎, 如果肯上網睇返, 太陽能板塊係過去一個月都係整體向上, 我相信咁樣代表住呢個行業已經開始轉勢

以升交量計都仲係好低, 短炒黎講現時的確未係最佳買入時機, 但我自己就大膽小小, 有信心上升既勢頭已經開始上升, 而且好多股票展開連綿不斷既升浪之前都係由低位以低成交量慢慢回升, 之後突破左尐阻力位就會係咁上

展開左升浪之後, 我認為最好既形態係一浪一浪咁升, 保持在10天或20天線之上, 對於尐突然大成交爆升既股份, 我認為呢個唔係最好既股票, 因為爆升果下可能已經佔左整個升浪既唔少部份, 當然如果以短炒睇, 呢個應視為一個利好, 可以跟入, 當然最後入之前先睇清楚爆升既原因, 如果只係偏向消息炒作, 咁既話就要做好心理準備, 有得食就食, 而如果係一尐涉及基本面改善, 例如重組, 業績比預期好好多, 咁既話可能會引發重估, 之後可能仲會升多一陣, 個人有跟開中航科工(2357), 因為落實左重組, 而母公司真係有做野, 所以係09年佢表現非常唔錯, 升足一年, 咁佢升得咁好其中一個原因係恒指係09年都升左好多

講返712, 佢4月尾出左今年第一季度業績(pdf), 賺2031.5萬人民幣(約2500萬港元), 去年09年全年只係賺2800萬港元, 照計應該出完業績會升, 第一季就賺左去年8成有多既利潤. 事實係出完業績繼續跌, 因為比市場預計低, 我睇過由廣發證券出既報告, 佢預期首季賺三千萬港元左右, 我估其他券商既預測應都差唔多; 全年計招商證券(招商資本係第二大股東)係4月頭出既報告預測佢EPS$0.22 (原本佢二月出既報告既EPS係$0.16), 目標價$2.87; 信達國際就預測2010年EPS係$0.198, 目標價$2.98, 即係2間都估佢今年會賺2億或以上

暫時都無外資行cover呢隻野, 就睇下遲下會唔會

照時間睇, 7月尾應會出半年業績, 如果係未來呢一兩個星期712會繼續升, 我估應該係有人知道業績會幾好睇, 偷步買入, 所以712下一個推動力應睇今年既中期報告, 希望會有符合甚至好過預期既成績, 其實如果了解呢個行業既投資者, 應該會知道間公司大概出黎既業績會點樣

券商們既預測好似好樂觀咁, 招商證券仲上調目標價, 第一季先賺2500萬, 真係可以全年賺2億以上? 睇埋中期報告先知

fatlone’s evaluation:
完全係斷估無痛苦咁估架咋, 一尐都唔專業

assumption 1.
公司主席接受一個訪問時曾經講過話今年會產出既產品大約有330MW(百萬瓦特), 我保守尐用齊頭300MW做推估 (呢篇新尐, 個CFO估今年可以去到350MW, 原因係預計第三季尾產能會上升至600MW, 不過到真係出左公告確認先算, 有無咁多訂單又另一回事)

assumption 2.
假設呢一年既每瓦特(per W)售價同09年相約, 根據2009年報每瓦特單價係6.0人民幣, 我預計今年既單價維持每瓦特5.4至6.0人民幣, 留10%降價空間應該足夠

毛利率及淨利率:
我用返2010年第一季度業績做reference(2010Q1毛利率=17.2%, 淨利率=10.2%), 我認為太陽能行業仲係復甦緊, 個人係看好, 但保守起見我會用返毛利率=17%, 淨利率=10%作基準 (呢篇野話管理層毛利率有望升至20%咁話喎)

營業額:
好簡單咁將產出 x 每瓦特售價 = 營業額, 預測結果為16.2億至18億人民幣, 如果以330MW作基準, 則可以上調至17.82億至19.8億, 兩者合併得出區間為16.2億至19.8億人民幣

毛利及淨利:
毛利預測為2.754億至3.366億人民幣; 淨利為1.62億至1.98億人民幣, 我以人民幣宣佈擴大浮動區間前既匯率作標準, 即約1人民幣兌1.14港元, 換算結果係1.85億至2.26億, 其實人民幣市場主流看法都係睇升, 所以我用1兌1.14做標準算係較保守. 好簡單咁用中位數做預測淨利, 得出結果為2.055億

預測每股盈利(forecast EPS)=2.055/10.32=0.199港元

我會給予卡姆丹克太陽能2010年預測市盈率合理區間為10倍至20倍, 對應股價為1.99港元至3.98港元, 一般券商給予既目標價約為2.9港元, 大約係我推估既區間既中位數

我心目中既最理想既中短線劇本係咁:
1. 首先慢慢升, 成交量雖低但不斷保持係10天/20天線以上, 慢慢推上去, 再升破上圖既「阻力1」區間, 大約在$1.7左右, 我個人認為短期內要升穿佢唔係問題

2. 之後成交量不斷增加, 開始建立起量能, 臨近業績公佈之前有顯著升幅就更好

3. 假設出左一份符合市場預期既中期業績, 推算到時既股價應該會係「阻力2」既區間, 大約在招股價$2.1左右, 如果係比預期好既話, 應該會升破埋

4. 中線既最終目標暫時set係歷史高位$2.95, 對我黎講以現階段睇信達既目標價係十分樂觀, 不過股市變幻莫測, 升得勁果陣目標價可以不斷調升

長線而言:

暫時睇到卡姆丹克日後既發展會係兩條路: 1. 繼續擴大產能 2.尋求併購機會

擴大產能方面, 根據已經報導既消息, 主席表示明年上半年將會從600MW擴大至1000MW, 爭取成為在高效率硅片的細分領域成為世界第一大生產商, 不過我唔會咁樂觀, 因為有甩底既前科, 係擴產方面早前已經出左通告話唔可以準時在6月尾時擴產至504MW, 不過好在佢又確認9月尾可以去到600MW, 個Roadmap就去到下年年中, 假若成真下年既產能增長接近7成

有消息話卡姆丹克會併購發展下游太陽能電池業務, 不過上面報導既消息話暫時都無計劃拓展產業鏈, 做埋下游咁話, 我諗主席咁講其中一個原因係專注自有業務已經好足夠, 而且公司規摸唔算大, 財力上未必許可, 雖然卡姆丹克財政穩健, 目前處於淨現金狀態, 要收購人地係有可能, 不過可能會大大增加負擔, 我諗主席都係一個穩陣既人, 不過如果有機會請主席你主動出擊, 可能到時就係配股抽水既時候了

雖則主席話玩一條龍唔係行業趨勢, 但我就覺得一條龍係會好尐, 好多時市場都覺得可以玩晒上中下游係一個利好因素, 除非成個行業都唔掂, 否則是旦一瓣唔掂都可以頂得住, 公司發展既穩定性會高尐, 投資人會偏好穩定性高既公司, 給予估值應會高一尐

除左玩一條龍, 收購可以提升自身技術水平或產品質素既公司都應視為長遠利好, 呢尐智識型產業, 去到最尾真係鬥技術, 技術就係核心, 技術高就代表賣得貴, 而且你尐野越貴, 多數越好賣, 因為太陽能呢尐科技野唔係睇每件產品既單價, 係睇產品既能量轉換效率, 效率高代表每瓦特售價可以降低, 加上技術高就係質素好, 質素好既產品可以享有溢價, 毛利率又會再高尐, 新能源行業成日都話產能過剩, 其實要講清楚尐係總體產能過剩, 高質素產能依然供不應求, 好似大功率既風機, 同高純度既多晶矽都係供不應求

卡姆丹克其中一個賣點係技術好, 佢自己話係行業既前列, 因為佢自己係搞半導體出身, 依家轉型搞純度唔使咁高既太陽能級既產品係一個優勢, 一切就要睇下未來既業績表現

廣告
本篇發表於 個股研究, 太陽能 並標籤為 , 。將永久鏈結加入書籤。

7 Responses to 個股研究: 卡姆丹克太陽能

  1. 引用通告: 一尐感想 | fatlone's investment paradise

  2. Gary 說道:

    師兄, 真係配股集資, 我 2.3x 都有貨, 你覺得點? 股價會跌嗎? 可以繼續持有嗎?

    • desmondctt 說道:

      嘩, 真係有人睇, 首先多謝捧場 🙂

      簡單D講, 呢個時候我個人係唔會沽:P 有錢既仲可能會再追, 原因如下 (答得太長氣, 懶懶地會做埋另一篇entry):

      我認為首先要視乎配股反應, 我比較樂觀, 相信應該好快會有人接晒, 一來金額唔大, 二來好多機構既報告既目標價都係大約在3蚊左右, 同配股價$2.3比較有水位

      經過呢個幾月出黎既消息, 應該預視到712會有一個十分強勁既增長, 2010全年產量應該唔過300MW, 但2011既訂單已經接到650MW, 就當佢日後零訂單, 齋係銷售量都已經升超過1倍

      而且, 另一個重點係我對佢主席有信心, 我認為佢係一個幹實事既人, 真心係做生意而唔係上左市之後玩財技抽水騙小股東錢, 如果發現係後者, 我一定唔會長渣 我見到係呢間公司會話畀投資者聽訂單情況, 會解釋資金會用作生產設備投資, 係一心想做4大間公司, 我係望佢係三年時間可以做到上市值過百億, 不過太陽能業波動好大, 三年時間好長, 呢個連公司主席本身都好難預測到

      公司本身係無問題, 最大風險係太陽能產業本身好唔好景, 大勢唔好咁就650MW都可以畀人cut單, 就算有650MW都可以銷售單價大跌, 毛利率急跌既話銷量再勁都補唔返, 不過到目前呢一刻為止, 太陽能業應該都幾好景, 至少未來呢一季都應該會唔錯

      我希望配股之後712股價會重新出發, 如果未來再有新增訂單作為催化劑, 我有信心歷史高位2.95唔難突破, 好多股份經過價值重估既階段之後都會有好可觀既升幅, 你可以睇下之前既醫藥股或者近期既本地零售股, 都係升都你唔信

      • Gary 說道:

        其實我系上年 11 月中入, 之後就渣住, 唔係公司一路公佈公司的情況同大計, 我都未必渣甘耐, 雖然我周不時系百度, google, yahoo search 料, 但我都預計唔到佢會再集資, 師兄預計到, 真係好勁, 睇完師兄甘講, 如果今次跌返 d, 我會考慮再入多注, 多謝師兄分柝析.

  3. 引用通告: first time being blacklisted, but i am quite happy for this | fatlone's investment paradise

  4. 引用通告: 卡姆丹克劇本2.0 (待續…) | fatlone's investment paradise

  5. 引用通告: 個股研究: 卡姆丹克太陽能 2011版本 | fatlone's investment paradise

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s