新能源(2): 太陽能

新能源系列: 太陽能

(其實想寫風能先, 不過無端端睇左太陽能相關個股, 所以順手打埋佢)

直至呢一刻, 新能源都只係一個概念, 太陽能業都唔例外, 無乜邊間公司真係交到一個話到畀人知道間公司可以持續增長既成績表, 要講到咁複雜係因為某尐新能源相關公司的確有試過大幅增長, 以下例子係陽光能源(757)

呢間公司既股價走勢 (慣左睇aastock"圖表分析", 應該用"股價走勢"會簡單清晰D, 就當之後自己睇返有多D資料睇), 由上市至今, 招股價$2.92, 無幾耐試過炒到上去6蚊樓上, 之後隨住金融海嘯, 一路跌到落去, 再加上太陽能既原材料多晶矽(內地叫做「硅」)價格急跌如果睇返我在新能源(1)入面既新能源政策果個表, 3月同5月都有利好太陽能既政策出台, 相信呢一個係陽光能源在09年3月至5月急升既原因. 之後就一路係咁跌, 因為09年除左有呢兩個利好政策之外, 國家亦都開始限制多晶矽產能, 因為製造多晶矽係高耗能, 高排放(簡稱「兩高」). 最重要既係產能過剩先係對太陽能行業最致命既打擊, 講黎講去都係產能過剩

關於太陽能產業既展望, 我google左幾條link畀自己睇, 有心既可以入去慢慢睇:

太陽能產業展望 (台股)

2010年太陽能產業四大趨勢

2010年太陽能產業展望


較有用既係佢個矽晶電池產業鏈個表, 話畀大家知太陽能既公司點分類, 以我依家有限既認知, 龍頭保利協鑫能源(3800)係屬於上游既多晶矽生產商, 多晶矽原材料價格比起08年第一季既高位下跌超過八成, 所以呢類股份都唔慌好得去邊, 無記錯既話龍頭保利協鑫本身應該唔係玩太陽能, 但用左二百幾億收購左一間叫做江蘇中能既多晶矽生產商, 單野可以係呢度(保利協鑫躍升龍頭 估值廉受惠中央環保新政)睇到, 入面都有D數據值得參考

而陽光能源(757)同埋卡姆丹克太陽能(712)係中上游, 都係造晶錠(太陽能電池主要部件), 前者就開始向下游業務發展, 即係做埋光伏模組果瓣, 不過其實上中下游都一樣唔掂, 成個行業都唔掂, 係得隻下游既興業太陽能(750)好尐

睇左呢幾條link, 都話呢幾年既多晶矽都係供過於求, 咁既話呢尐上游廠係咪繼續無運行? 不過交銀國際在上年12月出左個報告(pdf), 看好光伏行業, 簡略版可以睇交銀國際予光伏業「領先大市」評級
想了解下太陽能行業, 睇呢個報告就岩喇, 睇完就知我呢個blog尐野係幾咁小學雞, ha 😀 不過人地係出糧寫報告, pro架嘛:) 我呢尐業餘老散, 資歷又淺, 點比呢:)
話時話如果係報告出左無幾耐就買入, 渣到依家, 都好傷下

其實尐報告都係睇好太陽能係2010年既表現, 但到左今日, 2010都過左一半有多, 太陽能板塊都仲係咁弱, 究竟係尐分析員睇錯還是市場錯呢? 我諗邊個錯都好, 都唔好同市場鬥. 我呢尐小小老散, 缺乏第一手資訊, 市場上既太陽能股, 除左保利協鑫(3800)係過百億之外, 其餘都係(以現價計)20億都無, 有時扣埋主席持有既股份, 得果十億八億街貨, 所以好易受大戶主導, 股價波幅好大.

依家太陽能股中, 有兩間佈左首季業績, 卡姆丹克(712)同埋陽光能源(757)都有盈利, 兩間都表示訂單都幾爆, 未來業績應會不斷改善, 前景唔錯, 不過股價卻未能反映, 我真係諗唔通呢一點, 已經講到明訂單充足, 而產能繼續擴張, 即未來既營業額應會大幅增長, 除非毛利率預期會跌得更快, 否則業績幾可肯定會大幅增長, 如果以我有限既智慧去解釋, 我只諗到業績既反彈幅度係低於市場預期, 有幾好有時唔太重要, 最重要係符唔符合預期

fatlone短評:
我認為太陽能板塊估值已經算平, 但有無得再跌呢, 要睇返大市走勢, 如果大市跌而太陽能板塊跌幅比大市跌幅更少, 咁我相信呢個係開始有強者進場既訊號, 即係市場開始覺得堅係抵買. 睇返近排已經無乜財演推介過相關股份, 先前佢地推介果陣既止蝕價應一早跌穿, 越少人提既時候就係買入既機會

我覺得現階段仲未係最抵既時候, 但最抵=底, 我地永遠都估唔到底, 所以我睇法係可能仲有機會下調, 視乎大市走向, 而估值偏低反映出向下既空間唔會太大, 畢竟已經不斷反覆跌左成年, 估值已經降低好多, 股價都跌到幾殘下, downside應該有限. 最大隱憂唔係佢仲會跌好多, 而係佢幾時先升返上去, 如果長期低位橫行都唔好受

至於upside, 因為股價都幾低殘, 一旦反彈都會幾可觀, 呢個係基數過低之故. 30%係唔出奇. 不過因為呢個反彈既不確定性唔算低, 所以我唔建議大注入博反彈. 假如呢個反彈會出現, 咁出現既時候我估計會係太陽能股發佈比市場預期好既中期業績時, 又或者國家推出利好太陽能業既政策, 假如太陽能股全部都有一個好於預期既業績, 咁既話板塊應會獲得重估, 到時升幅就會好勁, 而應會last到一段時間

不過最尾都要睇返大市走勢, 大市勢弱, 乜野利好都要打折扣, 甚至完全抵消或嘔突

長線而言, 即一至三年內, 如果太陽能股(係是旦一個moment)升幅唔超過一倍, 咁我覺得太陽能板塊表現已經低於我預期

結論係我會小注買入, 買入原因係估值便宜, 加上開始有復甦跡象, 若獲得市場重估升幅會好可觀(主要係賭呢一點), 而且長遠潛在升幅巨大; 只落小注係存在唔太低既不確定性, 走勢亦都話畀我地知唔應該大注買入, 若只係炒波幅反而可以大注買入, 因股價細, 每一個價位波動相對股價都好大, 依家712, 757同3800都係介乎於$1.3x至$1.5左右, 每個價位$0.01, 一郁已經係大約0.7%, 食到4,5格已經有3幾個巴仙落袋

題外話:
其實呢尐所謂大行報告真係幾過癮, 你睇下睇下真係似層層, 如果你本身就有尐睇好, 再睇下佢地既分析, 真係可能會落疊, 但到你真係買左, 好似呢個例子咁, 唔止蝕既話, 真係好入肉, 成個太陽能板塊全部都跌到娘親都唔認得, 所以呢, 呢尐分析員報告, 你可以信, 但唔好跟住買, 我自己既經驗係, 你自己follow得隻野越耐, 到你出手買落去既時候, 佢升既機會係越高, 只係聽人地講幾句, 睇左人地幾篇blog就跟, 多數無好下場, 至少我呢個case係咁, 我覺得好巧合, 因為我自己用得最長時間睇既兩隻股票, 一買入之後都係會升, 雖然之後跌返不突止仲要坐艇, 但真係兩次買完就真係係咁升, 講緊係短時間內升超過30%, 如果當係短炒咁買入, 就非常和味了, 我唔係認叻, 如果係叻既話就沽左, 唔使搞到坐艇:P 買中左都未必有錢賺架有時~ 所以我就相信, 「人在做, 天在看」既道理, 你越係勤力, 個天就真係會回饋返畀你

廣告
本篇發表於 太陽能, 新能源 並標籤為 , , 。將永久鏈結加入書籤。

2 Responses to 新能源(2): 太陽能

  1. 引用通告: 跟進太陽能板塊 | fatlone's investment paradise

  2. 引用通告: first time being blacklisted, but i am quite happy for this | fatlone's investment paradise

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s